Поэзияны сұлулық пен көркемдік әлеміне теңесек, соның тылсымын ұғуға ұмтылып талаптанып, қалам ұстаған жергілікті жас ақындармен «Жас толқын жырлары» атты кездесу кеші өткізілді.Хромтау аудандық орталық кітапханасының ұйымдастыруымен өткен шараға жергілікті жас ақындар Сағыныш Оразайқызы, Бисенбаева Сайрагүл Таңатарқызы, Қалмұратов Жомарт Саматұлы, Реймов Қуандық Есболсынұлы, Айбол Сағынжанұлы, №1, №3 Хромтау орта мектептерінің оқушылары мен кітапхана қызметкерлері қатысты. Кештің мақсаты: Өлкеміздегі халықтың ыстық ықыласына бөленіп жүрген жас ақындарымыздың өрнегі мол жырларын оқуға насихаттау, жастардың кітап оқуға құлшынысын арттыру,өлеңдерін көпшілік оқырманның жүрегіне жеткізу. Шара барысында оқушылар ақындардың шығармашылығы және өмір жолдарымен кеңінен танысты. Ақындар жүректен жарып шыққан туындыларын оқып, олардың шығу тарихымен бөлісті. Қонақ кәдесімен келген айтыскер ақын Айбол Сағынжанұлы кешке келген көрермендерге қазақтың қара домбырасымен арнауын тарту етті. Кеш барысында жергілікті ақын Сағыныш Оразайқызының сөзіне жазылған "Ауылым" әнін Ерхат Амангелдиев, Нұрболат Бірімжановтың орындауында көрермен назарына ұсынылды. Қаламгерлер оқушылардың сауалдарына жауап беріп, өлең өрімдерін шебер қиюластырудың тәсілдерімен бөлісіп, ағалық кеңестерін берді. «Ақынын құрметтеген ел озады, ақынын сыйламаған ел тозады» демекші…

Хромтау аудандық кітапханасының оқу залында Шерхан Мұртазаның туғанына 90 жыл толуына орай "Халқы сүйген қаламгер" атты танымдық сағат ұйымдастырылды. Шараға аудандық кітапхана оқырмандары қатысты. Шара барысында жазушының өмірі мен шығармашылығы туралы мағлұмат беріліп, бейнесюжет көрсетілді. Шара соңында "Сөз өнерінің зергері" атты кітап көрмесіне библиографиялық шолу жасалды.                              

Хромтау аудандық кітапханасында «Kitap Time-2022» кітап фестивалі аясында кітапхананың алаңында буккроссинг ұйымдастырылды. Буккроссингтің мақсаты: оқырмандар арасында әр түрлі жастағы оқырмандарды кітап оқуға шақыру, кітапханаға оқырмандарды тарту, күнделікті өмірдегі әр оқырманның кітап оқу әрекетін танымал етуге өз үлесін қосу. Шара барысында буккроссинг оқырман мен кітап арасын жақындататын, кітап оқуға шақыратын қоғамдық қозғалыстардың бірі екенін оқырмандарға түсіндіре отырып, үйімізде шаң -тозаң болып жатқан немесе оқылған кітаптарға «екінші өмір сыйлау» керек екені айтылды. Сонымен қатар, ұлттық шығармаларды ұлықтаған қазақ әдебиетінің тарландары Мұхтар Әуезовтің 125 жылдығына, Шерхан Мұртазаның 90 жылдығына арналған кітап көрмесі ұйымдастырылды. Көрмеге жазушылардың кітап қорындағы әр жылдары жарық көрген шығармалары мен энциклопедиялар, өмірбаяндық анықтамалықтар, олар туралы әдебиеттер ұсынылған. Мақсаты- жазушылардың өмірі және шығармашылық қызметімен таныстыру, қазақ әдебиетінің дамуына елеулі үлес қосқан танымал тұлғалардың шығармаларын оқуға оқырмандардың назарын аудару.