«Бір ел – бір кітап» акциясы аясында көрнекті жазушы, қоғам қайраткері Қабдеш Жұмаділовтің «Тағдыр» романы бойынша «Тағдыр – ұлт тарихының көркем шежіресі» атты оқырмандар конференциясы өтті. 🎯 Іс-шараның мақсаты – Қабдеш Жұмаділовтің шығармашылық мұрасын насихаттау, «Тағдыр» романы арқылы қазақ халқының тарихи тағдырын, ұлттық болмысын және елдік құндылықтарын таныту. Конференцияға Хромтау жоғары тау-кен техникалық колледжінің студенттері қатысты. Кездесу барысында студенттер роман мазмұнын талдап, шығармада бейнеленген қазақ халқының басынан өткерген тарихи кезеңдері мен тағдырлы оқиғалар туралы өз ойларын ортаға салды. 📖 Іс-шара барысында кітап көрмесіне библиографиялық шолу жасалып, жазушының шығармашылық жолы мен әдеби мұрасы таныстырылды. Сонымен қатар, «Демежан Келгенбайұлы – жаңа тұрпатты ұлттық қайраткер» тақырыбында баяндама жасалды. Баяндамада романның басты кейіпкері Демежанның ел үшін атқарған ерен еңбегі, биік рухы, парасаттылығы мен отаншылдық қасиеттері кеңінен сөз болды. ✨ «Тағдыр» – жеке адамның ғана емес, тұтас бір халықтың тарихи тағдырын, елдік рухын бейнелейтін тағылымды шығарма.

2 қазан күні Хромтау аудандық кітапханасының ұйымдастыруымен 1 қазан – Қарттар күніне орай ардагер әжелермен «Шежіре шерткім келеді» атты сыр-сұхбат, әңгіме сағаты өтті. Ақ дастархан басында өткен тағылымды кездесуде ардагер әжелер өмір жолдарынан сыр шертіп, жүрекжарды естеліктерімен бөлісті. Қазақ халқының салт-дәстүрі мен әдет-ғұрпы, ұлттық тәрбие мен ұрпақтар сабақтастығы туралы өнегелі әңгімелер айтылды. 🎶 Кездесу барысында әжелер халық әндерін орындап, әсем әндерімен шараның шырайын келтірді. Жылы жүздесу барысында үлкенге құрмет, кішіге ізет көрсету, ұлттық құндылықтарды дәріптеу мәселелеріне ерекше мән берілді. Осындай тағылымды кездесулер – аға буынның өмірлік тәжірибесін кейінгі ұрпаққа жеткізудің, ұлттық рухани құндылықтарды насихаттаудың маңызды жолы. 💐 Ардагерлеріміз аман болып, ақ батасы мен өнегелі әңгімесі ұрпаққа шамшырақ болсын!

2026 жылғы 29 қыркүйек күні Хромтау аудандық кітапханасының ұйымдастыруымен ауылдық кітапханашылар арасында «Креативті кітапханашы – 2026» аудандық байқауы өтті. Байқауға ауданның 8 ауылдық кітапханашысы қатысып, 4 кезең бойынша кәсіби білімі мен шығармашылық қабілеттерін, тапқырлығы мен заманауи әдістерді қолдану шеберлігін көрсетті. Байқау қорытындысы: Бас жүлде – Тассай ауылдық кітапханасының кітапханашысы Карина А. І орын – Көктау ауылдық кітапханасының кітапханашысы Турганбаева Э. ІІ орын – Абай ауылдық кітапханасының кітапханашысы Сағымбаева А. ІІІ орын – Ақжар ауылдық модельді кітапханасының кітапханашысы Омарова У. Қалған қатысушылар арнайы номинациялармен марапатталды. Байқау кітапханашыларға тәжірибе алмасып, жаңа идеяларымен бөлісуге және шығармашылық мүмкіндіктерін танытуға тамаша мүмкіндік болды. Барша қатысушыларды құттықтаймыз! Жаңа шығармашылық жетістіктер тілейміз!