Хромтау аудандық балалар кітапханасында Кітап фестивалі аясында 4-сынып оқушыларының қатысуымен ерекше форматтағы «BOOK CAFE» интеллектуалды кітап дәмханасы өтті. 🍽️ Бұл дәмханада кәдімгі тағамдардың орнына балаларға қызықты кітап тапсырмалары ұсынылды. Қатысушылар «Жеті лақтың дәрумен салаты», «Дәмді мақал-мәтел», «Білімнің ыстық сорпасы», «Кітап пиццасы», «Алдар Көсенің қуырдағы», «Күлше қыздың сиқырлы торты», «Ер Төстіктің батыр тоқашы», «Әдеби смузи» және басқа да танымдық «дәмдерден» ауыз тиді. 👥 «Тапқырлар» мен «Кітапқұмарлар» командалары мақал-мәтелдерді жалғастырып, жұмбақтардың шешуін тауып, ертегі кейіпкерлерін анықтап, блиц-сұрақтарға жауап берді. Сонымен қатар кітап көрмесімен танысып, қызықты кітаптар мен энциклопедияларды тамашалады. ✨ Шара барысында балалар өз білімдерін, тапқырлықтарын және ұйымшылдықтарын көрсетіп, кітап әлемінің қаншалықты қызықты әрі ғажайып екенін дәлелдеді. 📖 Кітап – білімнің кілті, қиялдың қанаты, болашаққа бастар жол!

Мектептен тыс білім беру орталығында Отбасы күніне арналған ата-аналар жиналысы барысында «Кітап оқитын ұлт» республикалық кітап оқу марафоны туралы ақпараттық-түсіндіру жұмыстары жүргізілді. Жиналысқа қатысқан ата-аналарға марафонның мақсаты мен міндеттері, қатысу бағыттары, тіркелу тәртібі және марафонға қатысу мүмкіндіктері туралы ақпарат берілді. Ата-аналар кітап оқуға деген қызығушылықты арттырудың, балаларды кітап оқуға баулудың маңыздылығымен танысып, марафонға қатысуға шақырылды.

«Кітап оқитын ұлт» кітап оқу марафоны аясында Хромтау аудандық кітапханасы Хромтау аудандық ардагерлер кеңесі және Хромтау аудандық тарихи-өлкетану музейі ұжымдарымен бірлесіп, түсіндіру және тіркеу жұмыстарын жүргізді. Іс-шара барысында аталған ұйымдардың қызметкерлеріне марафонның мақсаты мен міндеттері, қатысу тәртібі, тіркелу жолдары және негізгі талаптары түсіндірілді. 📖 Қатысушыларға марафонға кітапханаға келіп немесе онлайн форматта тіркелу мүмкіндігі туралы толық ақпарат берілді. 📚 Кітап оқу — білімді арттырып қана қоймай, ой-өрісті кеңейтіп, рухани дамуға жол ашады. 🌟 Кітап оқитын ұлт — білімді ұлт! Кітап оқуға бірге қадам басайық!